Սուրիական պատերազմին կապուած արտայայտութիւններ

Սուրիոյ դէպքերուն սկիզբէն ի վեր կարգ մը նախադասութիւններ բազմաթիւ անգամ կրկնուեցան:

Հոս կ'առանձնացնեմ այդ նախադասութիւններէն քանի մը հատը՝ դուք ալ աւելցուցէք այն ինչ որ կը յիշէք:

- Դուրսը հանգիստ բազկաթոռներու վրայ նստած խրատ տալը շատ դիւրին է (կամ՝ Միայն Հալէպ ապրողը կրնայ ճիշդ հասկնալ պատահածները):

- Մեզի ազատ ձգեցէք (կամ՝ մեր ուսերէն վար իջէք):

- Ինչպէ՞ս մարդիկ Հայաստան պիտի երթան երբ ամէն օր մեծ թիւով մարդիկ հոնկէ կ'արտագաղթեն (կամ՝ Եթէ նոյնիսկ գտնուին մարդիկ որոնք Հայաստան ուզեն երթալ, երկիրը պատրաստ չէ իրենց ընդունելու):

- Եթէ Ասատ չըլլար մեր վիճակը ասկէ շատ աւելի ծանր պիտի ըլլար (վճռական տարբերակ՝ Ասատը մեր պաշտպանն է):

- Խնդիրը Ասատին մնալու չմնալու հարցը չէ՝ միջազգային դաւադրութիւն է (աւելի ազդեցիկ տարբերակ՝ Աշխարհի վրայ երկիր չմնաց որ իր ոճրագործները Սուրիա չղրկեց):

- Ասատէն զատ ուրիշ մէկը չի կրնար այս երկիրը ղեկավարել (նոյն ոգիով՝ այս ժողովուրդը միայն գաւազանով կը ղեկավարուի):

- Ամենէն կարեւորը այն է որ Ասատ դիմացաւ, իսկ թշնամիներուն ուզածը չեղաւ (կամ՝ 90 երկիրներու դէմ պայքարելէ ետք դիմանալը ինքնին արդէն յաղթանակ կը նկատուի):

- Եղած չեղած մէկ երկու շաբթուայ հարց է (յետոյ ըսուեցաւ՝ եղած չեղածը երկու երեք ամսուայ հարց է, իսկ աւելի ուշ այսպիսի տարբերակներ ալ լսուեցան՝ մինչեւ ամառ ամէն ինչ կը վերջանայ, մինչեւ րամատան կամ նոր տարի ամէն ինչ լմնցած կ'ըլլայ):

- Վաղը Թուրքիան ալ Սուրիոյ պէս պիտի ըլլայ (շրջանային տարբերակ՝ վաղը Յորդանանն ու Ծոցի երկիրներն ալ բաժան բաժան պիտի ըլլան)

Զգաստութեան հրաւէրներ՝
- Անհեթեթ առաջարկներ մի ընէք:
- Սոցիալական ցանցերուն վրայ ձեր խելքէն փչածը մի գրէք:
- Պղտոր ջուրի մէջ ձուկ մի որսաք:
- Ժողովուրդը Խուճապի մի մտանէք:

Բացագանչութիւններ՝
- Ո՞ւր է ղեկավարութիւնը
- Ո՞ւր է Սփիւռքի նախարարութիւնը
- Ո՞ւր է սուրիական բանակը

Գործնական տեսք ունեցող արտայայտութիւններ՝
- Ի՞նչ կ'առաջարկես:
- Ի՞նչ ըսել կ'ուզես:

Թուաբանական հիմք ունեցող միտքեր՝
- Եթէ ամէն հայ մէկ տոլար տայ տասը միլիոն կը հաւաքուի:
- Այս տարի թելեթոնը լրիւ պէտք է Սուրիոյ յատկացուի:

Մրցանակակիր արտայայտութիւններ՝
1) Կը մաքրեն կոր:
2) Օդակայանը մէկ շաբաթէն պիտի բացուի: 
3) Ամէն ինչ նորմալ է:

Ապազգային արտայայտութիւններ՝
- Ես Ալիին եւ Մուհամէտին քով կը մեռնիմ եւ Հայաստան չեմ երթար:
- Հայաստանի մէջ ցոյցերու ելան Սուրիահայերուն դէմ:

Ինքնախաբէութիւններ՝
- Մենք Հայաստան եկանք օդափոխութեան համար:

 Հրաչ Քէլսահակեան