Արեւմտահայերէնի եւ արեւելահայերէնի մերձեցման համաժողովէն եզրակացուցի մէկ բան, որ մերձեցում ըսելով պէտք է հասկնալ ոչ թէ երկու լեզուներու կատարեալ միաձուլում, որ գրեթէ անհնարին բան է ու մեզի ժառանգուած երկու հարուստ մշակոյթներուն համար՝աղէտ , ինչպէս քանիցս հաստատուեցաւ այստեղ,այլ արեւելահայերէնի մէջ տեղ գտած ռուսամէտ բառերուն փոխարինումը՝ արեւմտահայերէնի պերճաշուք բառամթերքով: «Ահա այս է այսօրուան հրամայականը» շեշտեց ՀՀ Սփիւռքի փոխ նախարար Սերժ Սրապոնեանը:
Գիտական զեկոյցներէն ու ուսումնասիրութիւններէն անդին, հնչեցին նաեւ տարբեր կարծիքներ ու առաջարկներ, որոնցմէ որպէս օրինակ յիշեմ մի քանին.
Այնպէս ինչպէս արեւմտահայ դպրոցականը փոքր տարիքէն առիթը կ'ունենայ քաջածանօթ ըլլալու արեւելահայ գրողներուն, նոյն ձեւով ալ արեւելահայ դպրոցականը փոքր տարիքէն պէտք է ծանօթանայ արեւմտահայ գրողին. այնպէս որ դասագիրքերուն մէջ պէտք է տեղ գտնեն երկու հատուածներէ գրողներու գործեր:
Խօսուեցաւ նաեւ համացանցային խաղերուն կատարած կարեւորագոյն դերին մասին՝ հայերէնի ուսուցման ու զարգացման ոլորտին մէջ: Ցարդ, պատրաստուած են արեւելահայերէնով համացանցային խաղեր եւ աշխատանքներ ալ կը տարուին նոյնը պատրաստելու նաեւ արեւմտահայերէն լեզուով:
Առաջարկուեցաւ հեռատեսիլային ծրագիրներուն մէջ տեղ տալ նաեւ արեւմտահայերէն հաղորդումներու:
Թող այս մերձեցման քայլը իրականութիւն դառնայ , որպէսզի սփիւռքահայու ու հայաստանցիի կապը առաւել ամրապնդուի եւ իւրաքանչիւր հայ քաջածանօթ ըլլալով լեզուի երկու հատուածներուն յանկարծ խօսակցութիւնդ ընդմիջելով քեզ չխրտչեցնէ ըսելով.« Խնդրում եմ հայերէն խօսա , հա՜». կամ ալ հակառակը՝ « հաճիս կամաց կը խօսի՞ս. չեմ հասկնար(կոր) ըսածդ»:
Սօսի Մ.Տ.
No comments:
Post a Comment